జూబ్లీహిల్స్‌లో మైనర్‌ బాలికపై అత్యాచార ఘటనపై తెలంగాణ కాంగ్రెస్ అధ్యక్షుడు రేవంత్ రెడ్డి తీవ్ర స్థాయిలో మండిపడ్డారు. హైదరాబాద్ పోలీస్ కమిషనర్ సీవీ ఆనంద్ ఈ కేసులో కీలక విషయాలను చెప్పలేదన్నారు. పోలీసులు ఏం దాచి పెడుతున్నారని ఆయన ప్రశ్నించారు. అమెరికా పర్యటన నుంచి తిరిగొచ్చిన టీపీసీసీ చీఫ్ రేవంత్‌రెడ్డి.. బుధవారం (జూన్ 8) మధ్యాహ్నం ఢిల్లీలో ఏర్పాటు చేసిన మీడియా సమావేశంలో మాట్లాడారు. అధికార టీఆర్‌ఎస్ పార్టీ, ఎంఐఎం పార్టీలపై ఘాటు విమర్శలు చేశారు.
‘ముఖ్యమంత్రి కే చంద్రశేఖర్ రావు అపాయింట్‌ చేసిన వక్ఫ్‌బోర్డు ఛైర్మన్‌.. జాతీయ, అంతర్జాతీయ స్థాయిలో ఏ చిన్న ఘటన జరిగినా స్పందించే అసదుద్దీన్‌ ఒవైసీ ఎంఐఎం పార్టీకి చెందిన ఎమ్మెల్యే కుటుంబంపై ఆరోపణలు వస్తున్నాయి. టీఆర్‌ఎస్, ఎంఐఎం పొత్తుల్లో భాగస్వాములు. ఎన్నికల్లో భాగస్వాములు. అధికారంలో భాగస్వాములు. చివరికి రేప్‌లు, మర్డర్లలో కూడా భాగస్వాములు’ అంటూ రేవంత్ రెడ్డి ఘాటు వ్యాఖ్యలు చేశారు.
జూబ్లీహిల్స్ కేసులో వాహనాల యజమానుల వివరాలను సీపీ సీవీ ఆనంద్ ఎందుకు దాచిపెడుతున్నారని రేవంత్ రెడ్డి ప్రశ్నించారు. మెర్సిడిస్ బెంజికారు ఎవరిదో సీపీ ఎందుకు చెప్పలేదని నిలదీశారు. ‘ఈ ఘటనలో ఉపయోగించిన కారు ఓనర్లను పోలీసులు పిలిచి విచారించారా? లేదా? ఎంవీ యాక్టు 133 ప్రకారం మైనర్లు కార్లు నడిపితే యజమానులకు నోటీసులు ఇవ్వాలి. ఇచ్చారా? మైనర్లు కార్లు నడపకపోతే ఘటనకు సహకరించిన వాహనాల యజమానులపై కూడా పోక్సో చట్టం ప్రకారం కేసులు నమోదు చేయాలి’ అని రేవంత్ రెడ్డి అన్నారు.
‘ఘటన జరిగిన తర్వాత 7 రోజుల పాటు ఇన్నోవా కారు ఎక్కడుంది? ఆ వాహనంపై ఉన్న ప్రభుత్వ స్టిక్కర్‌ తొలగించారు. ఉద్దేశపూర్వకంగా ఆధారాలు చెరిపేసే ప్రయత్నం చేశారు. ఇన్నోవాను ఎక్కడ స్వాధీనం చేసుకున్నారో పోలీసులు చెప్పలేదు’ అని రేవంత్ రెడ్డి అన్నారు.
‘ఇన్నోవా కారులో నిందితులు అత్యాచారం చేశారని సీవీ ఆనంద్ స్పష్టంగా చెప్పారు. ఇన్నోవా కారు ప్రభుత్వ వాహనమని లోకమంతా కోడై కూస్తోంది. ఆ కారులో డ్రైవర్‌ లేడని సీపీ చెప్పారు. డ్రైవర్‌ లేనప్పుడు కారును నడిపింది మైనర్లు. మైనర్లందరూ కలిసి ఇంత దారుణానికి పాల్పడితే వాహనాల యజమానుల వివరాలను సీవీ ఆనంద్ ఎందుకు దాచిపెడుతున్నారు. ప్రభుత్వ వాహనాన్ని అసాంఘిక కార్యక్రమాలకు వినియోగిస్తే కారుకు సంబంధించిన వివరాలను ఎందుకు కప్పిపుచ్చుతున్నారు?’ అని రేవంత్ రెడ్డి ప్రశ్నించారు.