ఏపీలో స్వాతంత్య్ర దినోత్సవం సందర్భంగా ఖైదీలకు క్షమాభిక్ష దక్కింది. వీరిలో 175 మంది జీవితఖైదీలు స్టాండింగ్‌ కౌన్సెల్‌ సిఫార్స్ చేయగా.. 75వ స్వాతంత్య్ర దినోత్సవాలు పురస్కరించుకుని ఆజాదీ కా అమృత్‌ మహోత్సవ్‌లో భాగంగా.. మరో 20 మంది ఇతర శిక్షలుపడ్డ ఖైదీలు విడుదలకానున్నారు. ఈ మొత్తం ఖైదీలలో 13 మంది మహిళలుకాగా.. వీరి సత్ప్రవర్తన ఆధారంగా ప్రభుత్వం విడుదలకు నిర్ణయం తీసుకుంది. రాష్ట్ర హోంశాఖ ప్రిన్సిపల్‌ సెక్రటరీ హరీష్‌కుమార్‌ గుప్తా ఆదేశాలు జారీచేశారు.
జైళ్ల నుంచి విడుదల కానున్న ఖైదీలు రూ.50 వేల వ్యక్తిగత పూచికత్తు జమ చేయాలి. శిక్షాకాలం ముగిసే వరకూ 3 నెలలకోసారి సంబంధిత పోలీస్‌స్టేషన్‌లో హాజరుకావాలని ప్రభుత్వం ఆదేశించింది. నేరపూరిత చర్యలకు పాల్పడితే వెంటనే రీ అరెస్ట్‌ అవుతారని హెచ్చరించారు. విడుదలయ్యే వారు.. విశాఖపట్నం సెంట్రల్‌ జైల్‌ నుంచి 33, రాజమండ్రి సెంట్రల్‌ జైల్‌ నుంచి 48, నెల్లూరు సెంట్రల్‌ జైల్‌ నుంచి 25 మంది, రాజమండ్రి మహిళా ఖైదీల ప్రత్యేక జైలు నుంచి 11 మంది విడుదలకాబోతున్నారు.
అలాగే విశాఖ సెంట్రల్‌ జైల్‌ నుంచి ఏడుగురు, రాజమండ్రి సెంట్రల్‌ జైల్‌ నుంచి ఏడుగురు, నెల్లూరు సెంట్రల్‌ జైల్‌ నుంచి ఇద్దరు, కడప సెంట్రల్‌ జైల్‌ నుంచి ముగ్గురు, అనంతపురం జిల్లా జైలు నుంచి ఒకరు విడుదల అవుతున్నారు. ఒంగోలు జిల్లా జైల్‌ నుంచి ఆరుగురు, కడప సెంట్రల్‌ జైల్‌ నుంచి 31 మంది.. అనంతపురం ఖైదీల వ్యవసాయ కాలనీ నుంచి 15 మంది, కడప మహిళా ఖైదీల ప్రత్యేక జైలు నుంచి ఇద్దరు, పొనుగొండ సబ్‌ జైలు నుంచి ఇద్దరు.. ధర్మవరం సబ్‌ జైలు నుంచి ఇద్దరు విడుదలవుతారు.