భారత పేసర్ దీపక్ చాహర్ ఓ ఇంటివాడయ్యాడు. తన ప్రేయసి జయ భరద్వాజ్‌ను జూన్ 2న ఆగ్రాలోని జయ్‌పీ ప్యాలెస్ హోటల్‌లో ఘనంగా పెళ్లి చేసుకున్నాడు. జయ సొంతూరైన ఢిల్లీలోని కమల్ మహల్‌లో ఉన్న ఐటీసీ మౌర్య హోటల్‌లో రిసెప్షన్ జరుగుతుందని తెలుస్తోంది. రిసెప్షన్‌కు 60 మంది క్రికెటర్లను ఆహ్వానించినట్లు సమాచారం. గత ఐపీఎల్ సీజన్ సమయంలో దుబాయ్ స్టేడియంలో చాహర్ ఆమెకు ప్రపోజ్ చేశాడు.
తన ప్రేయసి జయ భరద్వాజ్ పెళ్లాడిన విషయాన్ని చాహర్.. సోషల్ మీడియాలో ఎమోషనల్ పోస్ట్ ద్వారా తెలియజేశాడు. పెళ్లి ఫొటోను ఇన్‌స్టాగ్రామ్‌లో షేర్ చేసిన చాహర్.. ‘‘మొదటి సారి నిన్ను చూసినప్పుడు నువ్వే నాకు సరైన జోడీ అనిపించింది.. నా అభిప్రాయం సరైందే’’ అని రాసుకొచ్చాడు. ‘మనిద్దరం కలిసి జీవితంలో ప్రతి క్షణాన్ని ఆస్వాదించాం. నిన్ను ఎప్పటికీ ఇలాగే సంతోషంగా ఉంచుతానని మాటిస్తున్నా. నా జీవితంలో అద్భుత క్షణాల్లో ఇదొకటి’ అంటూ తన పెళ్లి గురించి అభిమానులతో పంచుకున్నాడు.
పెళ్లి ఫొటోను జయ భరద్వాజ్ సైతం ఇన్‌స్టాగ్రామ్‌లో పోస్టు చేసింది. ‘తను నా మనసు దోచుకున్నాడు. నేను తన చివరి పేరును దొంగిలించాను’ అనే క్యాప్షన్‌తో ఒకింత చిలిపిగా ఆమె ఇన్‌స్టాలో పెళ్లి ఫోటోను షేర్ చేసింది. నటుడు సిద్ధార్థ్ భరద్వాజ్ సోదరే జయ భరద్వాజ్. ముంబై యూనివర్సిటీ నుంచి డిగ్రీ పట్టా పొందిన ఆమె.. ఢిల్లీలోని ఓ కార్పొరేట్ సంస్థలో పని చేస్తున్నారు.
టీమిండియా కెప్టెన్ రోహిత్ శర్మ భార్య రితికా సజ్దేశ్, ఛతేశ్వర్ పుజారా వైఫ్ పూజా పబరి తదితరులు దీపక్ చాహర్ దంపతులకు విషెస్ తెలిపారు. స్పిన్నర్ రవి బిష్ణోయ్ నూతన దంపతులకు అభినందనలు తెలిపాడు. దీపక్ చాహర్ కజిన్, క్రికెటర్ రాహుల్ చాహర్ వివాహ వేడుకకకు సంబంధించిన ఫొటోలను షేర్ చేశాడు.
ఐపీఎల్ 2021లో చెన్నై సూపర్ కింగ్స్ చివరి లీగ్ మ్యాచ్‌లో పంజాబ్ కింగ్స్‌తో తలపడిన తర్వాత దీపక్ చాహర్ జయ భరద్వాజ్‌కు ప్రపోజ్ చేశాడు. మ్యాచ్ ముగిసిన తర్వాత స్టాండ్స్‌లోకి వెళ్లిన దీపక్ చాహర్.. నన్ను పెళ్లాడతావా అంటూ చేతికి ఉంగరం ఇచ్చి.. జయ భర్వాజ్‌ను ఆశ్చర్యానికి గురి చేశాడు. గాయం కారణంగా దీపక్ చాహర్ ఐపీఎల్ 2022 సీజన్ మొత్తానికి దూరమైన సంగతి తెలిసిందే. వెస్టిండీస్‌తో టీ20 సిరీస్ సమయంలో చాహర్ గాయపడ్డాడు. బెంగళూరులో రిహాబిలిటేషన్ సెంటర్లో చేరిన అనంతరం.. చాహర్ టోర్నీ మొత్తానికి దూరం అవుతున్నట్లు ప్రకటించారు.