జూబ్లీహిల్స్ గ్యాంగ్ రేప్ కేసులో పోలీసులు, ప్రభుత్వ తీరుపై బీజేపీ స్టేట్ చీఫ్ బండి సంజయ్ తీవ్ర స్థాయిలో మండిపడ్డారు. కేసుకు సంబంధించిన ఆధారాలన్నీ గల్లంతు చేశాకే ఎమ్మెల్యే కొడుకుపై కేసు పెట్టారని ఆరోపించారు. పోలీసులు ఎమ్మెల్యే వాహనాన్ని సర్వీసింగ్ చేసి ఆధారాలన్నీ గల్లంతయ్యాయని నిర్ధారణ చేసుకున్నాకే ఆయన కొడుకుపై కేసు పెట్టి నిందితుల జాబితాలో చివరన చేర్చారని దుయ్యబట్టారు. బీజేపీ ఉద్యమించడంవల్లే పోలీసులు ఈ మాత్రమైనా స్పందించారు. లేకపోతే కేసును మూసివేసేవారని చెప్పుకొచ్చారు.
రాష్ట్రంలో ఎక్కడ ఏ సంఘటన జరిగినా వెంటనే స్పందిస్తామని.. సీసీ కెమెరాలు, డ్రోన్ కెమెరాలు పసిగడతాయని చెప్పిన కేసీఆర్ కొడుకు కేటీఆర్ ఇప్పుడేమంటారని సంజయ్ నిలదీశారు. రాష్ట్రంలో అత్యాచారాలు చేస్తే కళ్లు పీకేస్తామన్న కేసీఆర్ ఏమైండని ప్రశ్నించారు. ప్లాన్ ప్రకారమే బాలికపై గ్యాంగ్ రేప్ అత్యాచారం జరిగిందని, ఈ కేసును వెంటనే సీబీఐకి అప్పగించాలని డిమాండ్ చేశారు. సీఎం కేసీఆర్ చేతగానితనం వల్లే రాష్ట్రంలో శాంతి భద్రతలు క్షీణిస్తున్నాయని బండి సంజయ్ ధ్వజమెత్తారు. గ్యాంగ్ రేప్ కేసులో మేజిస్ట్రేట్ ఎదుట బాలిక స్టేట్ మెంట్ రికార్డు చేయాల్సినప్పటికీ సకాలంలో చేయలేదని విమర్శించారు. ఎంఐఎం నాయకులు అత్యాచారాలు చేస్తుంటే.. టీఆర్ఎస్ నాయకులు హత్యలు చేస్తున్నారని ఆరోపణలు గుప్పించారు.
మరోవైపు.. వచ్చే నెల 2, 3 తేదీల్లో హైదరాబాద్లో జరగనున్న బీజేపీ జాతీయ కార్యవర్గ సమావేశాల ఏర్పాట్లపై పార్టీ రాష్ట్ర నేతలతో తరుణ్ చుగ్, సంస్థాగత సహ ప్రధాన కార్యదర్శి శివప్రకాశ్ బుధవారం పార్టీ ప్రధాన కార్యాలయంలో సమీక్షించారు. ఇందులో సంజయ్, లక్ష్మణ్, రఘునందన్ రావు, ఇంద్రసేనా రెడ్డి, రామచంద్రారెడ్డి, రాంచంద్రారావు, మంత్రి శ్రీనివాస్, ప్రదీప్ రావు, ప్రేమేందర్ రెడ్డి, మనోహర్ రెడ్డి తదితరులు పాల్గొన్నారు. పార్టీ జాతీయ కార్యవర్గ సమావేశాలకు సంబంధించి రాష్ట్ర శాఖ ఏర్పాటు చేసిన మొత్తం 38 కమిటీల్లో బుధవారం కొన్ని కమిటీలతో నేతలు భేటీ కాగా.. గురువారం మరికొన్ని కమిటీలతో హెచ్ఐసీసీలోని నోవాటెల్‌లో భేటీ అవనున్నారు.
సమావేశాల ఏర్పాట్లను సమీక్షించేందుకు కొత్తగా ఐదుగురితో స్టీరింగ్ కమిటీని పార్టీ రాష్ట్ర శాఖ ఏర్పాటు చేసింది. ఇందులో బీజేపీ స్టేట్ చీఫ్ బండి సంజయ్, రాజ్యసభ ఎంపీ లక్ష్మణ్, పార్టీ నేతలు చింతల రాంచందర్ రెడ్డి, మాజీ ఎమ్మెల్సీ రాంచందర్ రావు, మాజీ ఎమ్మెల్యే ఎన్వీఎస్ఎస్ ప్రభాకర్ ఉన్నారు. ఈ కమిటీ ఇవ్వాళ సమావేశం కానుంది.